لقيت مرة فانوس ودعكته

طلعلى عفريت قاللى

شبيك لبيك

قلت خلاص الذل انا ودعته

ويا عفريت بالطلبات

أنا ح أهريك

قالى هـــأوأو

يا انسان

دأنا عفريت مارد

ابن جان

مايهمنيش مكان

و لا زمان

واطلب و وأنا عندى

البرهان

قلت له

عاوز قمح زُرع فى مصر

ومسؤولين مبطلين الفشر

وحكومة متعصرنيش عصر

ومرتب يكفينى لآخر الشهر

عاوز

عيش بدون طوابير

وإنفاق حكومى بدون تبذير

وانتخابات من غير تزوير

ورئيس سابق اشوفه كتير

عاوز

فى بيتى شيكارة دقيق

وسبب مقنع لأى حريق

ومجلس شعب بدون تصفيق

وفى كأس العالم لينا فريق

عاوز مرة ازور شرم الشيخ

وصابعين كفتة م اللى فى السيخ

واشرب مرة عصير بطيخ

واخرج من القسم بدون تلطيخ

نفسى الضحكة ترجع تانى

وحتة لحمة كندوز او ضانى

وجنيه مصرى زى البرانى

ورصيف أمشى عليه انا وخلاّنى

رد العفريب عليه بغشم

وقال

يامصرى ماكنش العشم

بص

انا ممكن انقل لك الهرم

واسد لك الاوزون اللى اتخرم

وارجعلك الاكل اللى اتهضم

وتمأمأ البقرة زى الغنم

واعملك قصر من العدم

واقولك معنى شرم برم

بس طلباتك طلبات ملموس

عقله خلاص أكله السوس

ده تخطيط ياابنى ومدروس

انك تعيش على طول موكوس

واحنا بناخد منكم دروس

ازاى نخلى الجن متعوس

وياريتك ترجعنى تانى الفانوس

وزى بعضه أعيش محبوس

بدل ما اخرج

ويتلم الموكوس على المتعوس

د سعيد سعد

http://www.manshet.com/links_go.asp?id=34